Evrópa að loknum landsfundi

Eftirfarandi var samþykkt á landsfundi Samfylkingarinnar:

Samfylkingin leggur áherslu á að jafnaðarstefnan verði það leiðarljós sem lýsi efnahagsstjórn okkar á næstu árum. Gætt verði fyllsta réttlætis við uppbyggingu efnahagskerfisins. Hagsmunum Íslendinga eftir kosningar 2009 verður best borgið með félagshyggjustjórn sem sækir um aðild að ESB og leggur samning í dóm þjóðarinnar.

Þetta var samþykkt með dynjandi lófaklappi og var það ekki minna þegar nýkjörin formaður sagði að hún teldi að það væri best fyrir samfélagið að Sjálfstæðisflokkurinn væri best geymdur á stjórnarandstöðubekknum að loknum kosningum. (Allar húsmæður og feður vita að best er að senda börnin út að leika þegar taka á til ).

Evrópumálin voru reyndar rauður þráður í gegnum allan landsfundinn en staðreyndin er sú að Samfylkingin er ein flokka með svona skýra afstöðu í málinu, og jú L-listinn sem hafnar alfarið ESB aðild. Það er grein eftir sunnlendinginn Bjarna Harðarson og einn forsvarsmanna L-listans í Mogganum í dag þar sem hann færir rök sín fyrir því að hann telji þjóðaratkvæðagreiðslu um ESB- aðild ekki lýðræðislega. Orðrétt segir hann þetta sé ólýðræðislegt kosningaferli að leyfa þjóðinni að ákveða hvort  hún vilji samþykkja samning við ESB eða ekki. Lýðræðið er nú þannig að meirihlutinn ræður, sama hvort manni líkar betur eða verr. Bjarni Harðar er kannski með einhverja aðra sýn á lýðræðið. 

Framsóknarflokkurinn hefur reyndar verið hallur undir aðildarviðræður við ESB, þó hann gerir einhverja fyrirvara. VG vill leyfa þjóðinni að ráða þessu þó svo að flokkurinn sjálfur telji að hagsmunum Íslands sé best borgið utan sambandsins. Sjálfstæðisflokkur neitar að taka á þessu máli fyrir alvöru, enda hlýtur að vera erfitt fyrir marga Evrópusinna að vera í röðum Sjálfstæðisflokksins eftir landsfund þeirra um helgina.

Þannig að ef Samfylkingin ætlar að standa föst á þessu stóra hagsmunamáli Íslands þá er ekki nema um tvennt að velja í stjórnarmynstri; í stjórn með VG eða Framsókn - eða hvoru tveggja. Svo er einn möguleiki í stöðunni í viðbót að Samfylkingin verði ein flokka með meirihluta... en það er fullmikil bjartsýni.

En auðvitað eigum við að ganga til samninga við ESB og leggja hann í framhaldinu undir þjóðina. Það er lýðræði. Ég hef stundum heyrt að það gæti verið skynsamlegt að senda efasemdarfólk um ESB til samningsviðræðna til þess að ná betri samningum, það gæti verið vit í því. En við eigum að setja okkur samningsmarkmið og ganga til samninga á grundvelli þeirra. Og hananú!

Athugasemdir

[Ingólfur H Þorleifsson, 30.3.2009 kl. 11:16]

Sæl Arna Lára. 

Þar sem sá partur þjóðarinnar sem er ekki í Samfylkingunni virðist vera á móti þessu Evrópu brölti ykkar þá er ég ekki hræddur við að setja þetta í þjóðaratkvæði, það yrði kolfellt. Hvers vegna hafið þið engar lausnir aðrar en að láta ráðherrana í Brussel leysa vandan fyrir okkur. Það mun ekki gerast Arna. Allir aðrir flokkar eru á móti ESB. Að vísu gæti Framsókn selt þetta eins og annað til að komast til valda. Það er reyndar spennandi líka að sjá hvor gefur eftir þið eða VG ef starfa á saman eftir kosningar.

Einnig vil ég segja þér að ef þið ætlið í kosningar aðeins með Evrópudrauminn meðferðis, þá eru engar líkur á að þið fáið 32 þingmenn.

 En gangi þér annars vel í þessari baráttu sem fram undan er. Þetta verður mikið spretthlaup hjá ykkur öllum, og vafalaust skemmtilegur tími fram að kosningum. Held að nú í fyrsta skipti í mörg ár snúist kosningar um pólitík og ekkert annað. Hægri eða vinstri það er spurning sem fólk þarf að gera upp við sig fyrir 25 apríl.

[Arna Lára Jónsdóttir, 30.3.2009 kl. 12:21]

Sæll Ingólfur

Við erum allavega sammála um að setja málið í þjóðaratkvæðagreiðslu .

Ég er sammála þér í því að kosningarnar 25.apríl koma til með að snúast um stóru málin, þá á ég við afstöðuna til ESB, ríkisfjármálin, sjávarútvegsmálin auk þess sem taka þarf afstöðu til þeirrar grundvallarspurningar um hvers konar samfélag við ætlum að byggja um næstu árin svo fátt eitt sé nefnt. Takk fyrir góða kveðju. 

[Hilmar Gunnlaugsson, 31.3.2009 kl. 02:00]

Ég tek heilshugar undir þessa ályktun og tel hana mjög lýðræðislega.